Poesia: Quand serum fiulot

Che belèsa quand serum fiulot
in Via Cantoni al nùmer vot
l’era una cà de quei de ringhera
giugavum la bala matina e sera
Ciamavum foera la mama
vusavum in mes a la strada
per dig de bùtà giò
el pan e marmelada
Al Punt del la Ghisulfa
su e giò cui carelot
o in gir per la Buvisa
a fa un pu de casot
Induve saran andà
tùti chi bei pinela
che cureven in mes al prà
de la nostra vita bèla ?
L’era dùra quand serum fiulot
in Via Cantoni al nùmer vot
l’era un presèpi de bravi cristian
che tiraven avanti in mès ai malan
I sciuri savevum che gheren
però i avevum mai vist
la gent che ghera inturna
l’era fada de pover crist
La cà l’è brùsada tùta
sota i bumbardament
sem restà lì ammò tùti
ma pròpi sensa nìent
El cùnt curent, mia mama,
ghe l’aveva in del prestinè
nùm andavum a tò el pan
lù el marcava giò i danè
L’è stà un sògn quand serum fiulot
in Via Cantoni al nùmer vot
anca se ghera poc o nìent
gavevum el ben di noster gent
L’era una primavera
serum fiulot giucund
cuntent e sudisfà
de vès vegnù al mund
Serum cuntent perché
gavevum una cà
induve ghera denter
la Mama cunt el Papà
Franco Valsecchi